Господи помилуй 40
Помяни, Господи Боже, иже о вере и о надежди живота вечнаго, усопших раб Твоих имя рек, яко Благ и Человеколюбец, превосходя грехи и потребляя неправды, ослаби, остави, прости все вольное их согрешение и невольное, возставляя тех во святое второе пришествие Твое, в приобщение вечных Ти благ. О нихже в Тя Единаго вероваша, Истиннаго Бога и Человеколюбца. Яко Ты еси Воскресение и живот и покой Твоим рабом, Христе Боже наш, и Тебе славу возсылаем, со Безначальным Ти Отцем и с Пресвятым Духом, ныне и присно и во веки веком. Аминь.
Твой есмь аз спаси мя, [Упокой Господи, душа раб Твоих ] яко оправдании Твоих взысках. [Упокой Господи, душа раб Твоих ] Мене ждаша грешницы, погубити мя. Свидения Твоя разумех. Всякия кончины видех конец, широка заповедь Твоя зело. Коль возлюбих закон Твой Господи, весь день поучение мое есть. Паче враг моих умудрил мя еси заповедию Твоею, яко в век моя есть. Паче всех учащих мя разумех, яко свидения Твоя поучение мое есть. Паче старец разумех, яко заповеди Твоя взысках. [Упокой Господи, душа раб Твоих ]От всякаго пути лукава, возбраних ногам моим, яко да сохраню словеса Твоя. От судеб Твоих не удалихся, яко Ты законоположил ми еси. Коль сладка гортани моему словеса Твоя; паче меда устом моим. От заповедей Твоих разумех, сего ради возненавидех всяк путь неправды. Светильник ногам моим закон Твой, и свет стезям моим. Кляхся и поставих, сохранити судьбы правды Твоея. Смирихся до зела Господи, живи мя по словеси Твоему. [Упокой Господи, душа раб Твоих ] Вольная уст моих благоволи же Господи, и судьбам Твоим научи мя. Душа моя в руку Твоею выну, и закона Твоего не забых. Положиша грешницы сеть мне, и от заповедей Твоих не заблудих. Наследовах свидения Твоя в век, яко радование сердца моего суть. Обратих сердце мое сотворити оправдания Твоя, в век за воздаяние. Законопреступныя возненавидех, закон же Твой возлюбих. [Упокой Господи, душа раб Твоих ]Помощник мой и заступник мой еси Ты, на словеса Твоя уповах. Уклонитеся от мене лукавнующии, и испытаю заповеди Бога моего. Заступи мя по словеси Твоему, и жив буду, и не посрами мене от чаяния моего. Помози ми и спасуся, и поучуся во оправданиих Твоих выну. Уничижил еси вся отступающия от оправдании Твоих, яко неправедно помышление их. Преступающия непщевах вся грешныя земли, сего ради возлюбих свидения Твоя. Пригвозди от страха Твоего плоти моя, от судеб бо Твоих убояхся. Сотворих суд и правду, не предаждь мене обидящим мя. [Упокой Господи, душа раб Твоих ] Восприими раба Твоего во благо, да не оклеветают мене гордии. Очи мои исчезосте во спасение Твое, и в слово правды Твоея. Сотвори с рабом Твоим по милости Твоей, и судьбам Твоим научи мя. Раб Твой есмь аз, вразуми мя, и научуся свидением Твоим. Время сотворити Господеви, разориша закон Твой. Сего ради возлюбих заповеди Твоя, паче злата и топазия. Сего ради ко всем заповедем Твоим направляхся, всяк путь неправды возненавидех. Дивна свидения Твоя, сего ради испытает я душа моя. Явление словес Твоих просвещает и вразумляет младенца. Уста моя отверзох и превлекох дух, яко заповеди Твоя желах. [Упокой Господи, душа раб Твоих ]
Призри на мя и помилуй мя, [Упокой Господи, душа раб Твоих по суду любящих имя Твое. Стопы моя направи по словеси Твоему, и да не одолеет ми всяко беззаконие. Избави мя от клеветы человеческия, и сохраню заповеди Твоя. Лице Твое просвети на раба Твоего, и научи мя оправданием Твоим. Исходища водная изведосте очи мои, понеже не сохраних закон Твой. Праведен еси Господи, и прави суди Твои. Заповеда правду свидения Твоя, и истину зело. Истаяла мя есть жалость Твоя, яко забыша словеса Твоя врази мои. Разжжено слово Твое зело, и раб Твой возлюби е. Юноша аз есмь и уничижен, оправдании Твоих не забых. [Упокой Господи, душа раб Твоих ] Правда Твоя правда в век, и закон Твой истина. Скорби и нужды обретоша мя, заповеди Твоя поучение мое. Правда свидения Твоя в век, вразуми мя и жив буду. Возвах всем сердцем моим, услыши мя Господи, оправдании Твоих взыщу. Возвах Ти, спаси мя и сохраню свидения Твоя. Предварих в безгодии и возвах, на словеса Твоя уповах. [Упокой Господи, душа раб Твоих ] Предваристе очи мои ко утру, поучитися словесем Твоим. Глас мой услыши Господи, по милости Твоей и по судбе Твоей живи мя. Приближиша гонящии мя беззаконие, от закона же Твоего удалишася. Близ еси Ты Господи, и вси путие Твои истина. Исперва познах от свидении Твоих, яко в век основал я еси. Виждь смирение мое, и изми мя, яко закона Твоего не забых. [Упокой Господи, душа раб Твоих ] Суди суд мой, и избави мя, по словеси Твоему живи мя. Далече от грешник спасение, яко оправдании Твоих не взыскаша. Щедроты Твоя многи Господи, по судбе Твоей живи мя. Мнози изгонящии мя и стужающии ми, от свидении Твоих не уклонихся. Видех неразумевающия, и истаях, яко словес Твоих не сохраниша. Виждь, яко заповеди Твоя возлюбих Господи, по милости Твоей живи мя. [Упокой Господи, душа раб Твоих ] Начало словес Твоих истина, и в век вся судбы правды Твоея. Князи погнаша мя туне, и от словес Твоих устрашися сердце мое. Возрадуюся аз о словесех Твоих, яко обретаяи корысть многу. Неправду возненавидех, и омерзе ми, закон же Твой возлюбих. Седмицею днем хвалих Тя, о судьбах правды Твоея. Мир мног любящим закон Твой, и несть им соблазны. Чаях спасение Твое Господи, и заповеди Твоя возлюбих. Сохрани душа моя свидения Твоя, и возлюби я зело. Сохраних заповеди Твоя, и свидения Твоя, яко вси путие мои пред Тобою, Господи. Да приближится молитва моя пред Тя Господи, по словеси Твоему вразуми мя. Да внидет прошение мое пред Тя Господи, по словеси Твоему избави мя. [Упокой Господи, душа раб Твоих ] Отрыгнут устне мои пение, егда научиши мя оправданием Твоим. Провещает язык мой словеса Твоя, яко вся заповеди Твоя правда. Буди рука Твоя спасти мя, яко заповеди Твоя изволих. Вожделех спасение Твое Господи, и закон Твой поучение мое есть.
Жива будет душа моя и восхвалит Тя, и судьбы Твоя помогут мне. Заблудих, яко овча погибшее, взыщи раба Твоего, яко заповеди Твоя не забых. [Упокой Господи, душа раб Твоих ] Трижды
Посем тропари
Благословен еси Господи, научи мя оправданием Твоимъ
Святых лик обрете источник жизни, и дверь райскую обрящу и аз путь покаянием, погибшее овча аз есмь, призови мя Спасе и спаси мя
Иже дланию от небытия создав мя, и образом своим Божественным почтивый, преступлением же заповеди, паки возвратив мя в землю от нея же взят бых, и наподобие возведи мя и древнею красотою вообрази мя
Образ есмь неизреченныя славы Твоея, аще и язвы ношу согрешения, но ущедри Свое создание Владыко, и очисти Своим милосердием. И желаемое отечество подаждь ми, и раеви паки сотвори мя жителя
Иже в путь узки и прискорбныи ходившии, и вси иже в житии, крест яко ярем на рамо вземшии, и мне последовавши верою, придите и примите, яже уготовах вам почести венцы небесныя
Иже агньца Божия проповедавшее, и заклании бысте яко агньцы, и к жизни вечней святии преставльшеся, тому прилежно мученицы молитеся, согрешением разрешение нам даровати
Покой Боже рабы Своя, и учини их в Раи, идеже лицы святых Ти Господи, и праведнии яко светили сияют. Усопших раб Своих покой, презря им вся прегрешения
Слава: Трисветлаго Единаго Божества благочестно поем вопиюще, Свят еси Отче Безначальныи, и Собезначальный Сыне, и Божественный Душе. Просвети нас со страхом вопиющих Ти, и от вечнаго огня исхити
И ныне: Радуйся Чистая, яже Бога плотию без семени рождьшая, во спасение всем. Тобою бо род человеческий обрете спасение. И тобою рай да обрящем Богородице Чистая и Благословенная
Аллилуиа, аллилуиа, слава Тебе Боже трижды
Господи, помилуй 40 раз и молитва об упокоении:
Помяни, Господи Боже, иже о вере и о надежди живота вечнаго …
Покой, Спасе наш, с праведными рабы Твоя, и сия всели во дворы Твоя, якоже есть писано, презирая яко Благ, прегрешения их, вольная и невольная, и вся яже в ведении и не в ведении, Человеколюбче.
Слава и ныне: Иже от Девы возсиявый миру, Христе Боже, сыны света Тою показавый, помилуй нас.
Канон, Песнь 1
Ирмос: Воду прошед яко по суху, из египетска зла избежав, израильтянин вопияше: Избавителю и Богу нашему поем.
Припев: Дивен Бог во святых Своих, Бог Израилев (поклон).
Смертию смерть Христову, и страстьми Страсть подражавше честную, мученицы вси Божественныя и блаженныя жизни получиша.
Покой, Господи, души усопших раб Твоих (поклон)
Юности прегрешения презря и грехи превосходя, Христе Спасе, прежде усопшия рабы Твоя со избранными Твоими сопричти.
Слава: Юже получиша славу же и радость, иже блаженное стяжавше пребывание, подаждь богатно Твоим рабом, яже приял еси, Многомилостиве.
И ныне: Зачала еси Слово Отчее, плоти соединившееся по ипостаси, Еже из Тебе, всенепорочная Отроковице, ад Божественною силою упразднившее.
Песнь 3
Ирмос: Небесному кругу Верхотворче Господи, и Церкви Зиждителю, Ты мене утверди в любви Твоей, желаний сый край, верным утвержение, Едине Человеколюбче.
Дивен Бог во святых Своих, Бог Израилев.
Очистившеся древняго прародительнаго падения крещением и паки порождением, струями же кровей своих окропившеся, Христу, блаженнии, сцарствуете.
Покой, Господи, души усопших раб Твоих.
Иже мертв волею положься во гробе и живущия во гробех взываяй, Спасе, благоволи, яже от нас приял еси, в селениих праведных Твоих сим водворятися.
Слава: Благоутробием Божественныя Твоея, Владыко, и соестественне разумеваемыя благости умолен бывая, грехов разрешение подав рабом Твоим, Спасе, упокой.
И ныне: Воплощься из чрева Твоего, и быв Человек, Иже изрядне сый един человеколюбец, спасает человека от врат смертных, Богомати Пречистая, едина всепетая.
Господи, помилуй 40 раз и молитва об упокоении:
Помяни, Господи Боже, иже о вере и о надежди живота …
Седален, глас 6-й
Воистинну суета всяческая, житие же сон и сень, ибо всуе мятется всяк земный, якоже рече Писание: егда мир приобрящем, тогда во гроб вселимся, идеже вкупе царие и князи и убозии. Темже, Христе Боже, преставльшихся упокой, яко человеколюбец.
Слва и ныне: Всесвтая Богородце, во время живота моего не остави мене, челвеческому предстатльству не ввери мя, но Сама мя заступи и помилуй мя (поем).
Песнь 4
Ирмос: Ты моя крепость, Господи, Ты моя и сила, Ты мой Бог, ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.
Дивен Бог во святых Своих, Бог Израилев.
Да Твоея, Владыко, славы узрят, и светлость Твою светодательную на небесех получат светло, всяк вид мучений носити претерпеша мученицы Божественнии, Тебе, Христе, поюще: силе Твоей слава, Человеколюбче.
Покой, Господи, души усопших раб Твоих.
Многи обители у Тебе, Спасе, суть, по достоянию всем разделяемы, по мере добродетелей: тыя убо, Щедре, исполнити сих сподоби, яже верою преставльшияся, благочестно Тебе вопиющия: силе Твоей слава, Человеколюбче.
Слава: Равен нам человек явился еси, Безсмертне, всем равно смерть претерпел еси и жизни показал еси путь, еяже преставльшияся сподоби, яко человеколюбец, прощение согрешений, яко Владыка подавая, и света причастие даруй.
И ныне: Ты верных похвала еси, Безневестная, Ты предстательница и Ты прибежище христиан: стена и пристанище, к Сыну Твоему мольбы носиши, Всенепорочная, и спасаеши от бед иже верою и любовию Богородице Чистую Тя ведущия.
Песнь 5
Ирмос: Вскую мя отринул еси от лица Твоего, Свете незаходяй, и покрыла мя есть чуждая тьма, окаяннаго; но обрати мя и к свету заповедей Твоих пути моя направи, молю Ти ся.
Дивен Бог во святых Своих, Бог Израилев.
Несказанныя Твоея славы и еже паче слова Твоего блаженства, в селениих святых, идеже глас красен празднующих, преставленныя к безстрастней жизни, ущедрив, сподоби, Едине Человеколюбче.
Покой, Господи, души усопших раб Твоих.
Идеже чини ангельстии, идеже праведных собори радуются, Авраама в недрех всели, Спасе, рабы Твоя, и со дерзновением страшному и Божественному Престолу предстати благоволи, Благоутробне.
Слава: Очищение нам явился еси, правда же и избавление, и язвою Твоею наша немощи уврачевал еси. Ты убо, Щедре, яко благ, преставльшияся в сладости райстей учини.
И ныне: Милостивно, Милостиве, человечества меру восприял еси, Иже Божественныя славы превышшими украшаяй возвышеньми, от Девических ложесн плоть прием одушевлену, словесну, еюже смерть погубил еси.
Песнь 6
Ирмос: Очисти мя, Спасе, многа бо беззакония моя, и из глубины зол возведи мя, молюся, к Тебе бо воззвах, и услыши мя, Боже спасения моего.
Дивен Бог во святых Своих, Бог Израилев.
Мученицы Твои, Спасе, многия муки претерпеша, любовию Твоею душами уязвившеся святии, Твоея желающе присносущныя славы и сладкаго Твоего причастия.
Покой, Господи, души усопших раб Твоих.
Чрево врага смертию растерзал еси, Спасе, и вся яже в нем юзники воскресил еси, живот даровавый, егоже преставленныя, Благодетелю, сподоби.
Слава: Слез и воздыхания сущия во аде рабы Твоя свободи, Спасе: яко един бо благоутробен, отъял еси всякую слезу от всякаго лица верно благословящих Тя.
И ныне: Иже естеством Содетель, содетельствуется в ложеснах Твоих, полный, яко Бог, истощавается, Всенепорочная: един Безсмертный, за всех спасение умирает смертию.
Господи, помилуй 40 раз и молитва об упокоении:
Помяни, Господи Боже, иже о вере и о надежди …
Кондак, глас 8-й
Со святыми покой, Христе, душа раб Своих, идеже несть болезни, ни печали, ни воздыхания, но жизнь вечная.
Икос
Сам един еси Безсмертный, сотворивый и создавый человека; земнии убо от земли создании быхом и в землю туюжде пойдем, якоже повелел еси создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще и поюще песнь ангельскую аллилуия (поем)
Песнь 7
Ирмос: Отроцы еврейстии в пещи попраша пламень дерзнувша и на росу огнь преложиша, вопиюще: благословен еси, Господи Боже, во веки.
Дивен Бог во святых Своих, Бог Израилев.
Все желание мучеников простреся ко единому Владыце, любовию Тому соединяемое, и поющее: благословен еси, Господи Боже, во веки.
Покой, Господи, души усопших раб Твоих.
Подаеши верою преставльшимся светлость Божественнаго Царствия, нетления одежду даруяй вопиющим: благословен еси, Господи Боже, во веки.
Слава: Исполни радости и веселия яже преставил еси рабы Твоя, Щедре, сподобивый их взывати Тебе и пети: благословен еси, Господи Боже, во веки.
И ныне: Разрешая Евину клятву, в пренепорочную вселился еси Деву, благословения источник источая вопиющим: благословен, Пречистая, Плод Твоего чрева.
Песнь 8
Ирмос: Мусикийским органом согласящим и людем безчисленным, кланяющимся телу сущу на молебне, три отроцы песнославяща, Господа пойте и превозносите Его во веки.
Дивен Бог во святых Своих, Бог Израилев.
Земленыя подвиги прошедше, небесныя прияша венцы мученицы истиннии, вопиюще Ти непрестанно: Господа пойте и превозносите Его во вся веки.
Покой, Господи, души усопших раб Твоих.
Сошед в ров преисподнейший, иже во гробех живущия воскресил еси живоначальною дланию и подал еси рабом Твоим, верою прежде усопшим покой, Щедре.
Слава: Яко источник жизни присносущныя, яко сладости сый поток, рабы Твоя, благочестно к Тебе преставленныя сподоби пети и славословити Тя во вся веки.
И ныне: Марие Дево Богородице, яже Бога Спаса человеком рождшая телесно, спасай верою поющия Твое Рождество, и превозносящия во вся веки.
Песнь 9
Ирмос: Устрашися всяк слух неизреченна Божия схождения, яко Вышний волею сниде даже и до плоти, от Девическаго чрева быв убо Человек. Тем Тя Пречистую Богородицу, вернии, величаем.
Дивен Бог во святых Своих, Бог Израилев.
Имуще, мученицы Христовы, непобедимую крепость, и неодолеемую, уничижисте мучителей безбожное веление, и Царствия Небеснаго яве сподобистеся, просвещаеми Троичными зарями, достохвальнии.
Покой, Господи, души усопших раб Твоих.
Разрушися ад горький, разрушившу Ти его, Человеколюбче, и воскресившу яже от века тамо спящия; но и ныне, яко благ, прешедшия к Тебе, Благоутробне, невечерняго света Твоего сподоби.
Слава: Весь еси, Спасе, сладость, весь еси желание и любовь воистинну ненасытная, весь еси доброта несказанная, преставльшияся убо к Тебе, Твоея красоты наслаждатися благоволи и Божественныя доброты Твоея сподоби.
И ныне: Спаси мя, Мати Божия, рождшая Христа Спаса моего, Бога и Человека, сугуба естеством, не ипостасию: единородна убо от Отца, из Тебе же первородна всея твари; Егоже в сугубом естестве величаем.
Устрашися всяк слух неизреченна Божия снизхождения, яко Вышний волею сниде даже и до плоти, от Девическаго чрева быв Человек. Темже Пречистую Богородицу, вернии, величаем. Земной поклон
Святый Боже по Отче наш
Содухи праведными скончавшихся душа раб Твоих Спасе покой, сохраняя их во блаженней жизни яже у Тебе Человеколюбче
В покоищи Твоем Господи, идеже вси святи Твои почивают, усопших раб Твоих покой, яко Един Благ и Человеколюбец
Слава: Ты еси Бог сошедый во ад, и узы окованных разрешивый, и ныне усопшия рабы Твоя спасе покой
И ныне: Едина Чистая и непорочная Дево, яже Бога без семени рождшая Того моли спастися душам их
Господи помилуй 40
Честнейшую херувим… Слава и ныне Господи помилуй, Господи помилуй, Господи благослови
Господи Иисусе Христе Сыне Божий молитвами Пречистей Ти Матери и всех Святых Твоих помилуй и упокой душа раб Твоих в безконечныя веки яко Благ и Человеколюбец
Рабом Божиим преставльшимся отцем и братиям нашим и всем православным християном о них же и поминание творим вечная память (трижды)
Богородице Дево радуйся трижды
